Mar 6 | KQF | STEP | Yesu mba dobuna i gose bi i munaḡa ena malagai otiyenemo bi ena tauwaikaiwatana a kaiwata.

c 6:11Giugiukamaḡedi Edi Kauwa 13:50-51

d 6:13Diyemesi 5:14

e 6:14-162 Guyau 2:1-15; Mal 4:5-6

g 6:34Nambas 27:17; Delimaiya 23:5-6; Ezikel 34:11-15.

i 6:40Exodus 18:21

j 6:48Exodus 33:19; Dioba 9:8,11

Mark 6

Nasalet Lavedi Yesu A Miya Tautaulie

1 Yesu mba dobuna i gose bi i munaḡa ena malagai otiyenemo bi ena tauwaikaiwatana a kaiwata. 2 *waiyawasi laḡannemo tana wailovelove i waitubu bolu vanuwinemo. ^{▼▼6:2Waiyawasi laḡanna ba laḡan wai-7-na ḡome Maimaituwa ena noya i wai kovi bi i waiyawasi.} Bi lava wapewapedi ḡome enawai lovelove a vaivaiyena, tedi matabudi a tatava bi ai talapilina gado, “Niga nuwauyauyana bamo i vai? Bi kota bamo ḡailisi i vai bi anisove kauwidi ya voivoiyedi? 3 Tana ba tauwaikamda, Meli natuna. Bi tasitasina niga Diyemesi, Diosepa, Diudas bi Saimon. Bi kota nuvunuvuna niga vaiteda, ee?” Kamaina bi Yesu a daboke. 4 Yesu tedi i giuwedi, “Lava ḡesaudi ba taugiuwatana saviviviledi, bi ena dam bi ena vanuwa lavedi ba mote sima vivivile.” 5 Taunana aubaina lisidimo mote anisove kauwidi i voiyedi, bi lava sidesidedi visa ota lisidimo nimana dabedimo i sako bi i wai yawasanidi. Bi Yesu i sove te lavedi mote ai sumaḡe.

Yesu ena tauwaikaiwatana 12 i giu kamaḡedi te malagaiḡa a lauguguya nawa

Yesu i nawa malagaiḡa bi lava i wai lovelovedi. 7 Tana ena tauwaikaiwatana 12 i giuwedi te a nato lisinemo bi labulabuḡa i giu kamaḡedi. Tedi waibada i vitedi te aluwa gebogebodi sa vawai ubedi 8 bi kota niga mai i giuwedi, “Ko nawanawana mote bai ḡidoina koma vai, diḡona taunaḡa ko vai. Ko nawanawana mote kani, mote tana, mote mane koma tegini. 9 Bi kaḡesuma ba ko kotedi bi kwama ḡidoi mote koma vai.” 10 Bi kota niga mai i giuwedi, “Malagainemo ko tavatava bi sa ḡoyemina, mba vanuwinemo ko miyamiyana ee te malagaina ko gose. 11 Bi bamoda lava mote sima ḡoyemi bi mote simai beyavaiyemi, kamaina te kaḡemi gobusidi ko lai kulukuluvidi bi ko gose kamaḡedi. Mba wailove te muliḡa lisidimo bai ya tubuḡana, mba tedi edi wavu. ^{▼▼Diu lavedi eteni dobudiḡa sa vaḡavaḡai bi munaḡa aubaina, ba kaḡedi gobosidi sa lai kulukuluvidi kaka bi sa sola nawa edi malagaimo, mba laḡannemo tedi a visu. Yesu ena tauwaikaiwatana mai sa voiyena ba lava sa noḡoti munaḡedi te tedi mote a visu mai Diu.
,} ^c

12 Ena tauwaikaiwatana ḡome a nawa bi lava lisidimo a lauguguya te lava maso kamaina edi gebogebo a kuvesidi. 13 Tedi lava nopodimo aluwa gebogebodi a kwavidi, te a lau poti yovo. Bi kota olip masinemo lava sidesidedi tunidi a kailolodi bi ai yawasanidi. ^d

Guyau Alodi Yesu I Noḡoti Bena Diyoni Taukabulu

14 Yesu giuna kaikana i dididiga, taunana aubaina lava a giugiuna gado, “Diyoni Taukabulu male pekimo i kena moito. Taunana aubaina ḡailisi bi anisove kauwidi lisinemo sa tubutubuḡa.” Bi ḡesaudi a giugiuna gado, “Tana Elaidiya.” Bi kota ḡesaudi a giugiuna bena kage, “Bada taugiuwatana wala dolidolidi.” Bi guyau Alodi i vaiye te Yesu isana kaikana ya dididiga bi i giuna gado, “Tagu wala Diyoni tauwaibulu gadona e koi ḡavuki bi kota pekimo i kena moito munaḡa.” ^{e
,} ^{▼▼6:14Guyau Alodi:Alodi Entipas, Galili Tauwaibadaena.}

17 Alodi wala tauwaiḡavia i giukamaḡedi te Diyoni a kaididi bi alau seini te delimo a sako nawe. Alodi tinanatuna Pilip mwanena isana Elodias wala i kwaya. Taunana aubaina Diyoni Alodi niga mainana i giugiuwena gado, “Mote i visu te tinanatum mwanena kuna kwaya” Taunana aubaina, Elodias nuwana i medi Diyoni tauwaibulu lisinemo bi i ḡoyeḡoye te maso i wai peki. Bi mote i ḡemoḡemotina te maso mai i voiye, banina Alodi tana Diyoni i naile bi i labelabe kauwe. Bi i sibe te Diyoni tana lava waiyawa bi didimanina. Laḡan wapawapa Diyoni tana Alodi ena kauwa aubaina i giugiu matai bi Alodi i nuwanuwalaḡalaḡa te Diyoni ena giu mote i noḡonoḡoti watawata. Bi Alodi yaḡolo te Diyoni ena giu vaiyena i ḡoyeḡoye.

21 Kamaina bi Alodi ena tubuḡa saugina soina i kauwe. Bi gabegabemani bi edi taunoya, ḡavia babadidi, bi kota Galili babadidi i giuwedi te a tava ena soimo. Ḡome Elodias gavogavo i vai te ena nuwa kilikili ya voiye. 22 Ḡome Elodias natuna guguinina i saḡa bi i bigabiga te guyau Alodi ena soi taulisoena nuwedi i laukwasili. Kamaina bi guyau Alodi gomana i giuwena gado, “Bai kwai baḡaena, ba ḡemoḡemotina yea vitem.” 23 Alodi niga mainana gomana lisinemo i giuwapa, “Bai lisigumo kwai baḡaena ba yea vitem, bamo te egu waiguyau kwa ḡoyena, ba egu waiguyau nevana yea vitem.”

24 Gomana ḡome i poti yovo i nawa tinana i giuwena gado, “Bai yaibaḡae?” Bi tinana gomana i giuwena gado, “Tagu egu ḡowana Diyoni Taukabulu kununa.” 25 Gomana ḡome maḡemota i velau i munaḡa guyau Alodi lisinemo bi niga mai i waibaḡana, “Yea ḡoyeḡoyena noi taunana Diyoni Taukabulu kununa aboma noponemo.” 26 Niga giuna guyau i voiye te i wai nuwaboya kauwa. Bi tana mote ḡemoḡemotina te gomana ena giu ya giuvitale. Banina tana kaikana i giuwapa ena tauliso matedimo. 27 Kamaina bi guyau ena tauwaiḡaviya maḡemota i giukamaḡe te Diyoni gadona i koiḡavuki bi i vai natome. Tauwaiḡaviya i nawa delimo bi Diyoni gadona i koiḡavuki bi 28 abomemo i sako te i vai natome guyau i vite. Bi guyau i vai te gomana i vite, bi gomana i vai nawe te tinana i vite.

29 Laḡannemo Diyoni ena tauwaikaiwatana a vaiye te Diyoni i peki, tedi a tava te taubeuna a vai nawe te tauyewamo a sako.

Yesu Lava 5 Tausan I Waikanidi

(Metiu 14:13-21; Luk 9:10-17; Diyoni 6:1-14)

30 Yesu *giugiukamaḡedi i giu kamaḡedi bi a nawanawana a tava munaḡa te a wailovelovena bi lava a wai yawasanidina Yesu lisinemo atai nuwatau. 31 Lava ḡome a natonato bi a nawanawa aubaina tedi mote ḡemoḡemotina te a miya bi a kani. Taunana aubaina Yesu ena tauwaikaiwatana i giuwedina gado, “Temi taumiḡa ko nato ta nawa dobu ḡuyuwinemo bi ko sula waiyawasi.” 32 Kamaina bi tedi taudiḡa wagamo a gelu bi a nawa dobu ḡuyuwinemo. 33 Lava ḡome tedi noi a kitedi te a sibe otiedi. Kamaina bi malagai matabudi nopodimo lava a lau potiyovo bi geleḡa a vamakamakai te a gei tava. 34 Laḡannemo Yesu wagaḡa balabalamo i sunasuna saḡa, te lava kumna i kitedi bi i launuwatoiyedi. Banina tedi mai sipu bi taulabedi geḡa. ^g Kamaina bi giu visuvisuna wai lovelovedi i wai tubu. 35 Aubigamo ena tauwaikaiwatana a tava lisinemo bi niga mai a giuwe, “Niga ba dobu ḡuyuwina bi mateya te ya dudubala bi 36 lava kwa giu kamaḡedi sa nawa malagaiḡa bi malagai diyediyediḡa te kani sa kune bi sa kani.” 37 Bi Yesu niga mai i giuvitedi, “Temi kani ko vitedi te sa kani.” Bi tedi tana a giuwena gado, “Tam kwa ḡoyeḡoyena tama ka nawa te mane 200 denali luvana buledi ka kune bi ka vitedi sa kani ee?” ^{▼▼6:37Glik200 denali. Denali ba mane isana, denali ḡemota ba taubagibagi edi maiya suwala ḡemota luvana.} 38 Bi Yesu i wai talayedi, “Buledi visa lisimimo? Ko nawa ko kita.” Ena tauwaikaiwatana a nawa te a kita bi a giuna gado, “Buledi 5 bi iyana labu.” 39 Yesu ena tauwaikaiwatana i giuwedi te lava a laidubudubudi ḡawaḡawa gidegidevidi dabedimo te a miya. 40 Kamaina bi lava edi dubuḡa a miya lelesidi nevedi 100 bi nevedi 50. ⁱ 41 Ḡome Yesu buledi 5 bi iyana labu i tanodi te i wai kita saḡa galewemo bi Maimaituwa i wai ebone bi buledi i kivi. Tana i kivi kovi te ena tauwaikaiwatana i vitedi te a soiye bi lava a vitedi. Bi kota iyana vaitena i lisi bi a soiye edi dubuḡa. 42 Lava matabudi a kani te a kani nonoḡa. 43 Bi ena tauwaikaiwatana lava buledi bi iyana a kanikani sivudina a laitupa bi poa 12 ai wanavudi. 44 Olooloto taukani wapedi ba 5 tausan.

Yesu Topa Dabanaḡa I Natona Ena Tauwaikaiwatana Lisidimo

(Metiu 14:22-33; Diyoni 6:15-21)

45 Yesu maḡemota ena tauwaikaiwatana i giuvavasaḡedi te wagamo sa gelu bi sa dolidoli Betsaida ḡaḡaluna, noi nevanemo bi kota lava kumna i giu kamaḡedi. 46 Tana lava i wai ebonedi a nawanawa mulidimo tana i nawa oyamo laupali aubaina. 47 Tautaugudu balana bi waga topa modonemo taunaḡa i poupoule i kita nawe. Bi gelemo taunaḡa i moimoito. 48 Bi Yesu ena tauwaikaiwatana i kitedi te waga a ḡiuḡiu bi a kabikabiye, banina yavala i suvesuve didi bi labama i talatalaḡa. Kamaina bi laḡan sakosako balana Yesu topa dabanaḡa i nawanawa lisidimo bi tedi ainoḡota bena ima vawaitaulidi. ^j 49 Bi tedi ḡome a kitakitana ai noḡota bena alualuwa. Taunana aubaina tedi a naila gulata 50 bi a kabi binabinau. Ma ḡemota Yesu tedi lisidimo i giuna gado, “Nuwemi ya lautou. Tagu, mote koma naila.” 51 Kamaina bi Yesu waga dabanemo i moito saḡa lisidimo bi yavala i lautautau. Ena tauwaikaiwatana mai a kitakitana ba edi sove ai kovi. Banina Yesu buledi wala i kivikivina banina yaḡolo mote a sibe, aubaina te edi noḡota mote a didimana.

Lava wapewapedi Ganasaletimo Yesu i waiyawasanidi

(Metiu 14:34-36)

53 Laḡannemo Yesu ena tauwaikaiwatana vaitedi noi nevanemo a tava Ganasaletimo bi edi waga ai moito bi a pani kamaḡe. 54 Noi taunana wagamo a potipoti yovo te lava Yesu a kita ḡone. 55 Kamaina bi tedi a nawa mba dobuna bi diadiana lavedi a giuwedi, bi lava sidesidedi latilatimo ai kenedi bi a avala tava. Bi Yesu i nawanawana matanemo a wai kenedi. 56 Yesu i nawanawana malagaidiḡa bi malagai diadianaḡa lava edi lava sidesidedi a natomedi bi aniwaiḡemota gabudiḡa a wai kenedi. Bi Yesu ai baḡa vavasaḡe te maso ena gala isu damodamonaḡa a taukoni bi a yawasana. Tedi mabai tana ena gala a tautaukonina ba matabudi a yawasana.